GINAHULAT karon sa Davao City Police Office (DCPO) kung mopasaka og kaso ang pamilya sa 16-anyos nga babaye kinsa alegasyong miambak gikan sa fourth floor sa usa ka lodging inn sa Claro M. Recto, Davao City, Abril 25, 2025.
Sa report giingon ni DCPO spokesperson Police Captain Hazel Tuazon nga naghulat sila sa pamilya sa biktima unsay aksiyon sa kamatayon sa ilang kabanay nga menor de edad.
Una niini, nataho ang usa ka giingong miambak nga babaye gikan sa usa ka gambalay sa Claveria, hinungdan nga daling miresponde ang kapulisan sa San Pedro Police Station.
Pag-abot sa mga pulis sa lugar usa ka babaye nga nasutang 16-anyos ang nahagba kinsa naligsan pa sa dyip atol sa pagtugpa niini sa kalsada.
Subay sa rekord sa lodging inn, adlaw’ng Huwebes, Abril 24, 2025 pa naka-check in ang nahisgutan kinsa anaa kini sa 3rd floor nga room ug misaka suma pa sa 4th floor ug nanukad sa hagdanan sa fire exit dayon milayat padung sa ubos nga bahin.
Daling gidala ang nahisgutan sa ambulansiya padulong sa Southern Philippines Medical Center (SPMC) kinsa una nang gikataho sa medical bulletin niini nga anaa sa kritikal ang kondisyon human makahiagom og mga major injuries sa kalawasan, apan pagkabuntag gikompirma sa DCPO nga namatay na ang biktima.
Gisubay pa sab sa awtoridad ang posibleng kalapasan sa lodging inn sa pagpasulod niini og menor de edad samtang ang drayber sa PUJ nga nakaligis, temporaryo nga gikustodiya sa kapulisan.
Kung duna kamo'y mga gihambin sa galamhan ug nanginahanglan kamo og tawo nga maistoryahan sa inyong gidala nga kasubo, ug uban pang mga mental health crisis, puwede kamo nga motawag sa National Center for Mental Health, 0917-899-8727 (USAP), 7989-8727 (USAP) naa sab ang Hopeline, 0917-558-4673; 0918-873-4673; 8804-4673 2919 (toll-free for Globe and TM) ug mamahimo usab nga mokontak sa Philippine Mental Health Association (PMHA) Davao Chapter. (Jeepy P. Compio)