GISAULOG sa lokal nga panggamhanan sa Davao ang ika-161st nga adlaw'ng natawhan ni Andres Bonifacio Sabado sa buntag, Nobyembre 30, 2024, sa Andres Bonifacio Circle, Davao City.
Si Vice Mayor Melchor Quitain, nagrepresenta kang Mayor Sebastian “Baste” Duterte, nagsulti sa iyang mensahe nga ang local government unit of Davao nakighiusa sa tibuok nasud sa pagsaulog sa Bonifacio Day ug ang katawhan wala lang nagtapok sa maong adlaw aron sa kasaulogan, apan naghinumdom sab sa mga sakripisyo sa mga katigulangan kinsa nisalmot sa rebolusyon.
“Our history laid down the foundation of what our country has become in the present thus, it is our shared duty to ensure that such foundation remains unyielding and what the legacy of our heroes lives on to our prosperity,” pagtataw niya.
Si Colonel Yusok Hasan, deputy commander sa Task Force-Davao, nagrepresenta kang Lieutenant General Luis Rey Bergante, commander sa Eastern Mindanao Command, nagsulti sa iyang pamulong nga ang Pilipinas naghandom sa legasiya sa usa ka inilang bayani sa nasud.
Matud niya nga ang kabayanihan ni Bonifacio nagpadayon nga nagdasig sa mga Pinoy sa matag henerasyon.
Butyag niya nga si Bonifacio usa lang ka ordinaryo nga Pinoy apan dunay talagsaon nga "sense of duty," ug ang iyang istorya nakapahinumdom sa tanang mga sundalo nga ang pagkabayani di bahin sa bonggang rekursos apan kusog aron nga molihok alang sa mas labaw pang maayo.
Ug dugang niyang giingon, ang nasud naghimumdom sa paningkamot sa kaluwasan ug puwersa sa seguridad, apil na ang mga ahensiya sa gobyerno, non-government organizations, ug ang pagkalig-on sa Dabawenyos.
“Through our efforts the entire Davao Region is now insurgency free this achievement is a testament to the unwavering spirit of unity and determination that has brough us to this point,” pagkanayon pa niya.
Matud niya nga ang pagpaningkamot isip usa ka katawhan ug nasyon, ang nasud makaangkon ug tinuod ug malungtaron nga kalinaw alang sa Pilipinas.
Kinahanglan nga ang nasud molihok nga paatubang uban ang kasibot ug way puas nga pagkomitar aron nga makasustiner ug makamugna og pag-uswag nga nahimo sa nasud.
Gipahimug-atan ni Hasan ang kaimportante sa pagbubo o paggasto sa edukasyon, mentorship, ug programs nga mohatag og maayo, luwas, ug mas malampuson nga kaugmaon alang sa mga kabataang Dabawenyos, pagprotekta kanila gikan sa radikalisasyon ug "violent extremism."
Ang tema karong tuiga mao ang “Pagkakaisang Pilipino: Pundasyon ng Malaya at Maunlad na Bayan.”
Ang pag-obserba sa Bonifacio Day gimando sa Act 2946, subay sa Philippine Congress niadtong Pebrero 6, 1921, nga nagdeklara nga Nobyembre 30 sa matag tugi mamahimong adlaw sa paghinumdom sa pagkatawo ni Andres Bonifacio. (Rojean Grace G. Patumbon)