PADAYONG giatiman sa mga doktor sud sa balay tambalanan ang usa ka 17-anyos nga estudyante nga gidunggab sa laing ka-edad niya didto sa Purok 4, Barangay Maniki, Kapalong.
Ang biktima giila nga si alyas Samuel, estudyante nga taga Purok 6, Barangay Maniki, samtang ang suspek mao si alyas Ken, 17-anyos, ulitawo, estudyante, ug molupyo sa Purok 5, Barrio Site, Barangay Gabuyan.
Sila si Jhana Deadio Quilario ug Jessielax Gascon Pupa mireport sa kapulisan sa Kapalong sa nahitabo niadtong alas 12:45 a.m. Lunes, Abril 22, 2024.
Sa inisyal nga imbestigasyon, ang biktima uban sa iyang mga higala nagtagay sa dapit, samtang anaa sab didto ang suspek uban ang iyang mga higala.
Suma pa nga sa kalit lang mibarog ang suspek dayon luba sa biktima nga naigo sa kilid nga bahin sa iyang lawas.
Kauban sa biktima nagdali sa pagtabang kaniya ug gidala siya sa Kapalong District Hospital apan gibalhin ra sab siya sa Davao Regional Medical Center alang sa dugang medikasyon.
Samtang ang suspek boluntaryong mitahan sa iyang kaugalingon ngadto nila Benjie Vicente Auceran, ang konsehal sa Barangay Gabuyan ug kang Eugenio Canubas Amoc, Jr., barangay tanod.
Motibo sa pagdunggab wala pa giyagyag, diin suspek anaa na sa kustodiya sa Kapalong MPS. (DTV)