b10f-soce.jpg
MOABOT sa 17 ka mga kandidato ang nakaduso na sa ilang Statements of Contributions and Expenses (Soce) sa di pa mapupos ang gitakdang panahon Miyerkules, Hunyo 11, 2025, sumala sa Commission on Elections-Davao City (Comelec-Davao City).
Sumala sa Office of the Election Officer sa 1st District, upat ka mga kandidato sa pagka-konsehal niduso na sa ilang Soce sukad pa Hunyo 6, 2025, sa 23 kinatibuk-ang mga kandidato. Sukad sa pagsulat, wala pa makaduso og Soce ang lima ka mga kandidato alang sa pagka-kongresista sa 1st District.
Sa 2nd District, usa ka kandidato alang sa pagka-kongresista, sa tulo, ug upat ka kandidatong pagka-konsehal, sa 25, niduso na sa ilang Soce, sumala sa Office of the Election Officer sa 2nd District.
Samtang sa 3rd District, lima ka kandidato sa pagka-konsehal sa 27, ug usa ka kandidato sa pagka-kongresista sa lima, nakaduso na sa ilang Soce sukad pa Hunyo 6.
Gitaho sab sa buhatan nga usa ka kandidato sa pagka-bise mayor sa upat, ug usa ka pagka-mayor sa lima, nakasumite na sab sa ilang Soce.
Si Abogado Shajani M. Ebrahim, tsirman sa Board of Canvassers ug Third District Election Officer, nagsulti pinaagi sa text message nga ang pagsumite sa Soce nagpadayon pa.
“So far ongoing po ang receiving namin ng Soce,” butyag niya niadtong Hunyo 6, 2025.
Sayo niini, ang Comelec namahayag nga di na lugwayan ang gitakdang panahon alang sa pagduso sa Soce sa May 12, 2025, midterm elections.
Si George Garcia, tsirman sa Comelec, nagsulti sab niadtong Hunyo 3, 2025, nga walay plano nga lugwayan kini ug subling namahayag nga ang deadline nagpabilin sa Hunyo 11. Iyang gipahimug-atan nga ang deadline gipahibawo kaniadto pa.
“Therefore, you have to face the consequences of non-filing of Soce,” bahad niya.
Nagpasidaan ang Comelec nga bisan kinsa nga kandidato kinsa mapakyas sa pagsumite sa iyang Soce di tugtan nga makaasumer sa iyang buhatan ug mag-atubang og silot administratibo. Kadtong nakatuman isyuhan og Certificate of Formal Compliance, nga isumite sa pag-asumer sa buhatan.
Tanang Soce kinahanglan nga masumite sa "prescribed number" sa "hard copies", sukipan sa soft/electronic copy sa PDF ug Excel formats.
Gipahimug-atan sab sa buhatan nga ang pagsumite sa Soces pinaagi sa registered mail, email, courier, o messenger services gidili. (Rojean Grace G. Patumbon uban sa taho sa PNA)