MOABOT sa 17 ka Dabawenyos ang nanguna sa March 2025 Licensure Examination for Professional Teachers sa elementarya ug sekondarya.
Sa elementary level, si Mary Katherine Pecasales sa University of Southeastern Philippines (USeP) nahiluna sa ikalima nga puwesto uban sa grado nga 93.60 porsiyento; Maria Catrina Germo sa USeP-Tagum naa sa ikaunom uban ang grado nga 93.40 porsiyento; Glenisse Grace Buelis sa USeP-Davao naa sa ikasiyam nga luna uban ang 92.80 porsiyento nga grado; ug Jamaica Taypin sa University of Mindanao (UM)-Digos City naa sa ikanapulo uban ang 92.60 porsiyento.
Samtang sa high school level, sila Floyd Bandalan sa UM Tagum ug Leejane Cogollodo sa UM Panabo pulos nitugpa sa ikaduhang luna uban ang grado nga 93.60 porsiyento.
Sila si Irene Fe Navea sa UM Tagum ug Jemima Keziah Castro sa Davao de Oro State College-Main nakapahimutang sa ikatulo nga puwesto uban ang 93.40 porsiyento nga grado.
Sila si Jestonie Bapilar ug Mark Padilla sa Davao del Norte State College (DNSC) nahiluna sab sa ikalima uban ang grado nga 93 porsiyento.
Naa sab ikapito nga luna sa grado nga 92.60 porsiyento sila si Kimwel Boy Cortez sa Christian Colleges of Southeast Asia (CCSA); Dhana Jean Latayada sa Southern Philippines Baptist Theological Seminary (SPBTS); ug Mary Grace Ramos sa Assumption College of Nabunturan.
Si Noralshalah Guiamalodin sa UM Digos naa sa ikawalo uban ang grado nga 92.40 porsiyento. Sila si Arnel Mamac ug John Kenneth Masagca sa UM Tagum naa sa ikasiyam nga puwesto sa grado nga 92.20 porsiyento.
Ang unang tulo sa elementary level mao sila Jamaema Mustapha sa Mindanao State University (MSU) ug Raeiden Pango of MSU-Iligan Institute of Technology, pulos dunay 94.60 porsiyento nga grado, gisundan ni Nikhar Mae Alegria sa MSU-General Santos City.
Apil sa nag-unang tulo sa high school level mao sila si Jeanlyn Colipano sa Cebu Technological University uban ang 93.80 porsiyento nga grado, gisundan ni Sofia Atienza sa University of the Philippines (UP)-Diliman; John Reynor Pionilla sa UP-Los BaƱos; Bandalan ug Cogollodo dunay 93.60 porsiyento nga grado, ug Castro ug Navea sa ikatulo.
Sumala sa Professional Regulation Commission (PRC), kinatibuk-ang 16,282 elementary teachers sa 34,810 ka examinees, o 46.77 porsiyento, nipasar sa pasulit, samtang 38,747 sa secondary teachers sa 62,225 examinees, o 62.27 porsiyento ang nipasar.
Gihimo ang pasulit sa Marso 23, 2025, ug ang mga testing centers mao ang National Capital Region (NCR), Baguio, Butuan, Cagayan de Oro, Calapan, Cebu, Davao, Iloilo, Koronadal, Legazpi, Lucena, Pagadian, Palawan, Pampanga, Rosales, Tacloban, Tuguegarao, Zamboanga, Bacolod, Bayambang, Bohol, Catanduanes, Cauayan, Digos, Dumaguete, General Santos, Ilocos Norte, Ilocos Sur, Kidapawan, Laguna, Maasin (Southern Leyte), Masbate, Mati, Occidental Mindoro, Oroquieta, Romblon, Tagum, ug Valencia. (Rojean Grace G. Patumbon)