GENERAL SANTOS CITY — Ang Department of Environment and Natural Resources (DENR) sa Region 12 nakamonitor og kapin sa 17 ka libo nga mga langgam sa katubigan sa nagkalain-laing dapit sa Soccsksargen Region.
Gibutyag ni Atty. Felix S. Alicer, regional executive director sa DENR-12, nga ang dakong ihap sa mga langgam sa katubigan ang nakit-an sa lain-laing mga kalamakan (wetland) sa tibuok Rehiyon 12 atol sa Asian Waterbird Census (AWC) nga nagsugod niadtong Enero 10.
Gidugang sa opisyal nga ang mga langgam sa katubigan nabantayan ug nakita sa mga personahe sa DENR-12 sa daghang monitoring sites sa mga lungsod sa M’lang, Kabacan Cotabato, Alabel, Glan, Maitum, Kiamba Sarangani, Lake Sebu, Sto. Niño South Cotabato, Lebak, Lutayan Sultan Kudarat ug mga siyudad sa Tacurong ug General Santos.
Base sa report sa DENR-12 niabot sa 17,635 ka mga waterbird ang natala sa Soccsksargen wetlands, 4,934 niini ang nakita sa Cotabato; 1,922 sa Sarangani; 5,312 sa South Cotabato ug Gensan; ug 5,467 sa Sultan Kudarat.