NAGPING-IT sa kasakit ang usa ka dalaga human maigo ang iyang baba gikan sa mga nanglupad nga bato sa mga batan-ong nagriot pasado ala 1:15 sa kadlawon, Dominggo, April 7, 2024, sa probinsiya sa Cotabato.
Ang biktima giila nga si Loui Jane "LJ" Percalin, 18 anyos, ug taga Barangay Bual, Tulunan, Cotabato.
Suma ni Cotabato Police Provincial Director Colonel Gilberto Tuzon nga samtang naglakaw ang biktima uban ang iyang mga silingan sa Barangay Poblacion, Tulunan, Cotabato, nakurat na lamang sila sa kagubot gikan sa mga batan-on nga nag-away.
Kalit kaayo ang hitabo nga naigo ang baba sa babaye sa usa ka bato gikan sa mga batan-ong nagbinatuay.
Ang biktima nga nagkadugo gidala sa Tulunan District Hospital apan gibalhin sa Cotabato Regional and Medical Center (CRMC) sa Cotabato City tungod sa grabeng kahimtang niini.
Ang biktima pauli na unta gikan nanisco sa laing barangay.
Mihimo na og imbestigasyon ang Tulunan PNP aron mapatubag ang mga batan-on nga may kalabutan sa gidangatan sa dalaga. (EEF)