PERSONAL nga bikil ang usa sa mga motibo nga gilantaw sa pagpatay sa usa ka 18-anyos nga ulitawo nga gipusil samtang natulog sulod sa lawak nga girentahan didto sa Purok Vipatil, Barangay Magugpo West, Siyudad sa Tagum alas 9:10 sa gabii, Abril 17, 2024
Ang biktima mao si John Carlo Obeso, ulitawo, way trabaho, taga Purok Gemilina, Barangay Kingking, Pantukan, Davao De Oro.
Sa inisyal nga imbestigasyon, natulog ang biktima sud sa giabangan nga boarding house dihang may miabot nga tawong may bitbit nga armas ug kalit siyang gipusilan.
Dali sab nga nakasibat ang wala mailhi nga suspek human sa hitabo.
Ang atay’ng lawas sa biktima gipahiluna sa Villagan Funeral Homes, samtang nagpadayon ang kapulisan sa ilang imbestigasyon sa hitabo. (Dexter T. Visitacion)