NAGTINGKAGOL na sa prisuhan ang usa ka drug pusher nga karnaper pa human masignit sa gilusad nga operasyon sa otoridad sa Kidapawan City.
Mikumpisal ang 19-anyos nga drug suspect nga si Christian Lagua Silaya nga gawas sa illegal nga drugas, nalambigit usab siya sa carnapping.
Subay sa warrant of arrest, nasikop ang suspek sa iyang panimalay sa Purok Rambutan, Barangay Kalaisan, Kidapawan City, alas 7 p.m. niadtong Abril 4, 2024.
Sa panimalay sa suspek nakita ang chop-chop nga parte sa motorsiklo.
Matud ni Kidapawan City Chief of Police Lieutenant Colonel Dominador Palgan Jr. nga ang suspek namaligya sa online og chop-chop nga parte sa motor.
Si Mayor ug Atty. Jose Paolo Evangelista maoy usa sa mga saksi sa pagkasikop sa karnaper.
Nasakmit usab kang Silaya ang dagko ug gagmay nga pakete sa gidudahang shabu ug marijuana. (EEF)