2 babaye giluba; 2 lalaki nagda og hinagiban napusilan sa pulis

NATUGAW ang malinawong pagpahuway sa mga molupyo sa Purok Talisay, Zafra Compound, Barangay Magugpo East, Tagum City human mibansiwag ang kasaba ug siyagit gikan sa duguong insidente nga mikalas og upat ka kinabuhi.

Sa report sa Police Regional Office in Davao Region (PRO 11), insidente nahitabo alas 12:30 sa kaadlawon, Agosto 9, 2024, sa CZARS Boarding House sa nahisgutang lugar nga gipanag-iyahan ni Eleazar Timan Vitecaros.

Sa pagresponde sa kapulisan sa Tagum City Police Station sa lugar, misugat kanila ang nagkadugong patay'ng lawas sa usa ka babaye nga giilang si alyas Mae, 19, service crew sa usa ka mall ug nagrenta lang sa maong boarding house.

Gawas ni alyas Mae, nakita sab ang laing patay nga lawas ni alyas Joan, 28, cashier sa usa ka mall, nga renter sab sa boarding house.

Suspek sa krimen ang usa ka alyas Nelson, 33, sekyu nga taga Montevista, Davao de Oro.

Di pa matugkad sa awtoridad nganong gipangdunggab-patay sa suspek ang duha ka mga biktima.

Sa pag-abot sa kapulisan sa lugar, gisuwayan pa nila og hangyo ang suspek nga mosurender na lamang apan nagmagahi kini maong napusilan sa awtoridad ug napatay.

Sa dugang pagsuhid sa kapulisan sa dapit, nasugatan sab nila sa likod nga bahin sa boarding house ang usa ka lalaking si alyas Arjay, 21, ug molupyo sa Purok Basakan, Visayan Village sa maong siyudad nga may dalang sundang.

Giingong nanagana sab ang kapulisan kay gikanayong miaksiyon og dasmag si alyas Arjay, busa ila sab kining gipusil.

Gidali sab kini og dala sa mga pulis sa bay tambalanan apan nakabsan gihapon sa kinabuhi.

Sa pagsubay sa Davao Norte Provincial Forensic Unit (DNPFU) sa crime scene, nakuha ang 7 ka mga basiyo ug 3 ka balinis sa bala sa gituohang 9mm caliber nga pistola nga anaa na karon sa ilang kustodiya alang sa ballistic examination ug ang kutsilyong may gitas-ong 37 sentimentros.

Patay nga lawas sa mga biktima anaa na's punerarya sa dapit samtang imbestigasyon sa kaso nagpadayon. (RGV)