2 babaye naigo sa kilat, 1 patay

PATAY ang usa ka babaye human maigo sa kilat samtang ang kauban sab niya nga babaye naangol alas 3:10 sa hapon, Dominggo, Hulyo 28, 2024, sa Pandag, Maguindanao del Sur.

Namatay giila nga si alyas Ellaine samtang grabe nga naangol si alyas Anna, mga nagpuyo sa Carmen, Cotabato Province.

Sumala kang Pandag Chief of Police, Lieutenant Ernesto Rivera, nga sakay ang mga biktima sa usa ka Suzuki Raider 150 nga motorsiklo gikan sa Carmen ug paingon unta sa Tacurong City.

Apan pag-abot nila sa Barangay Kayaga, Pandag, Maguindanao del Sur nibundak ang makusog nga ulan.

Nanilong ang mga biktima sa waiting shed daplin sa national highway apan kalit lang milagapak ang kilat ug naigo ang duruha.

Giingong nangapaso ang mga biktima sa dihang naigo sa kusog kaayo nga boltahe sa kuryente sa kilat.

Dali silang gisapupo sa mga molupyo nga nakakita sa ilang gidangatan ug gihatud ngadto sa Buluan District Hospital apan gideklara si Ellaine nga dead on arrival.

Nagpahinumdom ang lokal nga panggamhanan sa Pandag sa publiko nga mag-amping kanunay ilabi na kung mag-ulan nga dunay kusog kaayong mga pagkilat. (EEF)