SIKPAW sa mga pulis ang duha ka ulitawo nga nalambigit sa ilegal nga lumba sa motorsiklo alas 6:15 sa buntag, Hunyo 28, 2025, sa Sto. Niño, South Cotabato Province.
Giila ang mga nadakpan nga sila alyas Sian, 20-anyos, ug alyas Gamay, nga pulos molupyo sa Tacurong City.
Sumala kang ni Sto. Niño Chief of Police, Police Major Raymund Faba nga dunay gihimong ilegal nga lumba sa motorsiklo sa national highway sa Barangay Guinsang-an ug Brgy Panay sa maong lungsod.
Abtik nga nagpahigayon og operasyon ang mga pulis ug nadakpan ang mga suspek nga sakay sa mini van nga dunay karga nga motorsiklo nga gamiton unta sa drag race.
Matud sa mga suspek, nadani sila sa pagsalmot sa drag race tungod sa premyo nga P15,000 nga madaug sa lumba.
Kasagaran sa niapil sa illegal drag racing nagagikan pa sa Davao City, Sultan Kudarat, Tacurong, Gensan, North Cotabato, South Cotabato, Cotabato City ug mga kasikbit nga dapit.
Gi-organisa ang drag race pinaagi sa organizer niini sa Facebook page nga "No Rules".
Gipalig-on pa kapulisan ang operasyon batok sa illegal drag racing sa probinsiya. (Edgar E. Fuerzas)