DUHA ka mga estudyante ang namatay samtang siyam pa ka tawo ang naangol human magbangga ang gisakyan sa wing van alas 11:00 sa buntag, Dominggo, Hunyo 9, 2024, sa Sarangani Province.
Giila ang mga namatay nga sila Christian Mark Cordero nga taga M'lang, Cotabato Province ug Allen Peniero nga molupyo sa Carmen, Cotabato Province.
Moabot sab sa siyam ka tawo ang naangol nga gidala ngadto sa balay tambalanan sa General Santos City.
Sa taho gikan sa kapulisan sa Malungon Municipal Police Station, nasayran nga mga biktima sakay sa Toyota D4D van gikan sa Glan nga nagpahigayon og Rover Scouting event sa mga miyembro sa Alpha Phi Omega fraternity.
Apan pag-abot nila sa Purok Agdao, Barangay Talus, Malandag, Malungon, Sarangani Province, nibangga kini sa likod nga bahin sa wing van nga nagparking kilid sa kalsada kay nadautan hinungdan nga waskag ang atubangan nga bahin sa D4D van.
Daghan ang nag-ingon nga kusog ang dagan sa van ug dunay warning device ang trak nga gibutang sa kalsada atol nga kini nadautan. (Edgar E. Fuerzas)