KIDAPAWAN CITY -- Hustisya ang singgit sa pamilya sa duha ka batan-on nga napalgang wa nay kinabuhi samtang anaa sa kasagbutan nga bahin sa Barangay Opon Magsaysay, Davao del Sur, niadtong Abril 5, 2024.
Ang duha nga unang gikataho nga missing ug wala mailhi sa mga tawong nagpuyo sa dapit, nailhan na nga sila si Matt Dumalaba, 18-anyos ug Norhan Alison, 16, pulos mga molupyo sa Barangay Central Malamote, Matalam, Cotabato.
Ang mga biktima napalgan nga gihiktan ang mga liog ug kamot, may mga samad sa nagkadaiyang bahin sa ilang lawas nga timailhan nga sila gipasakitan una gipatay.
Ang mga nawong niini gitaptan sab gamit ang ilang mga sanina.
Ang duha giila mismo sa ilang pamilya human nagpost sa social media ang kapulisan sa mga dagway niini. (EEF)