2 kawata'g manok, durian sikop

KASONG theft ang atubangon sa duha ka mga lalaki kinsa gialegar nga nangawat og durian ug usa ka pangsabong nga manok alas 6:20 sa gabii niadtong Martes, Oktubre 24, 2023, sa Alambre Public Gym, Barangay Alambre, Toril District, Davao City.

Giila sa Toril Police Station ang duha nga sila Rex Rallos Lañohan ug Reniel Saludar Plaza, pulos hamtong ug residente sa Toril Poblacion.

Una niini, usa ka Lucio Luy III ang mipaabot og reklamo sa Toril police human nga dunay natigayong pagpangawat sa Tagluno, Toril.

Daling mihimo og follow up operation ang Toril police hinungdan nga nasikop ang mga nahisgutan atubangan sa Alambre Public Gym.

Ang duha naaktuhan nga ilang gipamaligya ang durian nga alegasyong ilang kinawat, samtang narekober sab ang usa ka manok pangsabong.

Sa report, mikantidad og P6,000 ang manok pangsabong samtang ang durian nga motimbang og 50 kilos, mokantidad og P4,000.

Ang duha anaa na gikustodiya sa Toril police.