DUHA ka magbabalaod gikan sa Davao de Oro nakagunit og dakong posisyon sa ika-20 nga Kongreso, nagpalig-on sa nagkadako nga inpluwensiya sa nasudnong lehislasyon kon diin si Leyte First District Representative Ferdinand Martin Romualdez Sr. napabilin sa iyang posisyon isip Speaker of the House atol sa imbukadang sesyon sa Batasang Pambansa Complex sa Quezon City.
Si Representative Maria Carmen “Maricar” Zamora sa First District sa Davao de Oro napili isip tsirman sa Committee on Accounts, usa ka gamhanang panel nga molantaw sa internal financial operations sa House of Representatives.
Samtang si Second District Representative Leonel “Jhong” Ceniza natudlo nga Assistant Majority Floor Leader, usa ka dakong posisyon nga naglambigit sa pagdumala sa mga prayoridad sa lehislatibo ug mag-abag sa hapsay nga paglusad sa "House proceedings."
Ang ilang pagkapili sa maong mga posisyon nagpakita sa padayong pagsalig ug kompiyansa nga ilang naangkon gikan sa mga kaubang magbabalaod ug nahisubay uban sa pagduso ni Speaker Romualdez alang sa mas "efficient and responsive legislature."
Ang maong mga posisyon nakompirma human mapili og balik si Romualdez niadtong Lunes, Hulyo 28, uban ang makabungog nga 269 nga boto, apil ang suporta gikan sa pito sa onse ka congressional representatives gikan sa Davao Region, usa ka political landscape nga kanhi balwarte ni Duterte.
Si Zamora, kinsa mao karon ang nangulo sa komite nga maoy responsable sa pagbadyet, pagpalit, ug internal disbursements sulod sa balay balauranan, gilauman nga modula og kritikal nga papel aron nga maseguro ang "fiscal discipline and institutional transparency."
Sa pikas bahin, si Ceniza nahimong kabahin sa House floor leadership team gitahasan sa pakig-koordinar sa legislative actions ug pagmugna og "consensus on priority measures": sa majority bloc.
Kini nga mga pagkatudlo makita isip pag-ila sa ilang kapasidad sa liderato ug testamento ngadto sa nagkadako nga kalambigitan sa Davao de Oro sa pagmugna og nasudnong balaod.
Nagpadayag og garbo ang mga lokal nga opisyal ug molupyo sa pagsalig nga gihatag ngadto sa mga representante sa Davao de Oro nga nagpakita sa lig-ong indikasyon sa ilang kaandam sa pag-abaga sa mas dako nga responsabilidad sa pagbitad sa inklusibo nga kauswagan ug makahulganon nga mga reporma.
Si Romualdez, kinsa nangulo sa 19th Congress, uban ang kapin 11,500 ka mga balaudnon nga gipasaka ug 287 measures nga nahimong balaod, positibo nga ang 20th Congress mas molabaw pa sa mga gilauman pinaagi sa hiniusang paningkamot sa mga beterano ug bagohang lideres sa balay balauran.
Lain pang mga Mindanaoan nga magbabalaod nga gihatagan sab og dagkong papel mao si Davao del Norte First District Representative De Carlo Uy nga gidesignar isip usa sa mga Assistant Majority Leaders, samtang si Davao Oriental Second District Representative Cheeno Miguel Almario natudlo nga Assistant Majority Leader for Social Services, mga posisyon nga magdugang pa sa pagpalig-on sa tingog sa rehiyon sa hisgutanang lehislasyon. (David Ezra Francisquete)