DUHA ka mga indibiduwal ang nalumos atol sa Semena Santa, sumala sa Coast Guard District Southeastern Mindanao (CGDSEM) sa Philippine Coast Guard (PCG).
Sa paghinabi sa telepono uban ang SunStar, Lunes, Abril 21, 2025, gisulti ni CGDSEM spokesperson LTJG Winston Gonzales nga ang pag-obserba sa Semana Santa sa rehiyon nagmalinawon, nga way dagkong insidente sa kadagatan nga natala.
“We are happy to announce that almost all of our stations recorded no major incidents,” tug-an ni Gonzales.
“This reflects the effectiveness of our coordinated efforts with local government units, beach resort operators, and other stakeholders to ensure public safety during the long holiday,” esplikar niya.
Apan gikompirma ni Gonzales nga bisan og malinawon sa kinatibuk-an ang selebrasyon sa Semana Santa, duna ka mga insidente sa pagkalumos ang natala sa rehiyon.
Usa sa mga insidente nahitabo sa Dominggo sa Pagkabanhaw, Abril 20, 2025, sa Tinago Beach sa Barangay Pangubatan, Island Garden City of Samal (IGACOS), Davao del Norte. Ang biktima, nailhan nga si alyas Adie, molupyo sa Kaputian District, giingong nalumos samtang naligo sa “No Swim Zone” area.
Sumala sa taho, mga rescuers daling niresponde ug nihimo og CPR una gibiyahe ang biktima ngadto sa pinakaduol nga ospital. Apan gideklara kining dead on arrival sa mihiling nga doktor.
Ang ikaduhang insidente nahitabo sa Biyernes Santo, Abril 18, 2025, sa Leling Beach Resort sa Hagonoy, Davao del Sur. Ang biktima, nailang si alyas Erni, 75-anyos nga pangedaron nga molupyo sa Kidapawan City, North Cotabato, gitaho nga naligo apan kalit lang nalumos.
Pasiunang nasayran nga gawas sa kainit sa panahon, ang biktima giingong nagtagay og makahubog nga ilimnon ug gituohan nga nakasinati og atake sa hypertension, nga nakatampo sa iyang pagkalumos.
Sama sa nahiunang kaso, gidali siya og dala ngadto sa duol nga ospital apan gideklara nga dead on arrival.
Subling nagpasidaan si Gonzales nga importante kaayo ang motuman sa pahimangno kung mangaligo sa dagat ilabi na sa mga peak seasons.
“We continue to urge the public to follow local advisories and be mindful of designated swim zones to prevent further tragedies,” dugang pa niya. (David Ezra Francisquete)