2 namaligya mga pusil napusoy

2 namaligya mga pusil napusoy
CIDG-Barmm

ARESTADO ang duha ka mag-uuma nga giingong namaligya og mga pusil alas 11:15 sa buntag, Sabado, Mayo 4, 2024, sa Alamada, probinsiya sa Cotabato.

Giila ang mga suspek nga sila Marlon Danding alyas “Titing” ug Saddam Polayagan nga pulos molupyo sa Barangay Polayagan, Alamada sa maong probinsiya.

Gibutyag ni Criminal Investigation and Detection Group-Bangsamoro Autonomous Region (CIDG-BAR) Regional Director Lieutenant Colonel Ariel Huesca nga nagpahigayon sila og entrapment operation sa Barangay Polayagan sa lungsod batok sa mga suspek.

Sa dihang gitunol na sa mga suspek ang mga pusil nga ilang gibaligya sa asset sa CIDG, dali gilayon silang gipangsikop.

Narekober sa CIDG-BAR gikan sa mga dinakpan ang duha ka M1 Garand rifles, usa ka kalibre .45 nga pistola, mga magazines ug bala.

Gikanayon ni Huesca nga dugay na nilang gisundan ang mga suspek nga gitumbok nga mga "gunrunners".

Sa kasamtangan, balhog na ang mga suspek sa CIDG detention cell sa Cotabato City ug mag-atubang og kaso nga kalapasan sa Republic Act 10591 o Comprehensive Law on Firearms and Ammunition Regulation Act.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph