COTABATO CITY — Pasakaan og kaso nga kalapasan sa "Unlawful Sale of Firearms and Ammunition" ang duha ka tawo human madakpi alas 8:30 sa buntag, Miyerkules, Oktubre 16, 2024, sa Maguindanao del Norte.
Giila ang mga suspek nga sila Taher Baomba alyas Ismail ug Daw Rivas, mga molupyo sa Barangay Tambo, Sultan Mastura sa maong probinsiya.
Gibutyag ni Criminal Investigation and Detection Group sa Bangsamoro Autonomous Region (CIDG-BAR) Regional Chief, Lieutenant Colonel Ariel Huesca, nga nagpahigayon sila og entrapment operation batok sa mga suspek duol sa ilang gipuy-an.
Sa dihang akto nang gitunol sa mga suspek ang armas nga paliton unta sa nagtakuban nga sakop sa CIDG-Barmm, gilayon silang gisignit.
Narekober gikan sa ilang posisyon ang usa ka M16 Armalite rifle, mga bala, bandolier ug mga magazines.
Gitumbok nga ang mga suspek miyembro sa usa ka Moro front.
Balhog na ang duruha sa prisohan sa CIDG-Barmm samtang naghuwat kanus-a taralon ngadto sa hukmanan. (Edgar E. Fuerzas)