2 nangaangol sa bangga luwas na

ANAA na sa luwas nga kahimtang ang duha ka mga tawo nga nangaangol sa natigayong bangga sa public utility jeepney (PUJ) ug multicab alas 6 sa buntag Biyernes, Hulyo 12, 2024, sa Purok 5, Barangay Bunawan Proper, Bunawan District, Davao City.

Angol ang driver sa multicab ug ang pasahero sa PUJ sa dihang nagbangga ang duha ka nasampit nga mga sakyanan.

Wala pa mailhi ang driver sa multicab samtang gisulat ning balita kagahapon, apan pasahero sa PUJ nailhang si Jacinto G. Fuentes Jr., ug ang driver sa PUJ mao si Jobet Rabuta Cruz.

Subay sa report sa traffic investigation section sa Bunawan Police Station, nasayran nga samtang nagdagan ang duha ka mga sakyanan sa Daang Maharlika Highway, sa opposite lane, ang PUJ anaa sa inner lane gikan North bound paingon sa South bound, samtang ang multicab paingon sa North bound gikan South bound.

Sa pasiunang imbestigasyon migula nga kalit nga misimang ang multicab sa linya sa PUJ hinungdan nga nabangga kini.

Dali sab miabot ang mga rescuers diin ang mga naangol gipangdala ngadto sa Southern Philippine Medical Center. (Jeepy P. Compio)