BALHOG sa prisohan ang duha ka tawo nga nagpalusot og smuggled cigarettes alas 2:00 sa hapon, Huwebes, Abril 10, 2025, sa Barira, Maguindanao del Norte.
Giila ang mga suspek nga sila alyas Rod ug alyas Usman, taga Cotabato City.
Gibutyag ni Police Regional Office-Bangsamoro Autonomous Region (PRO-BAR) Regional Director, Police Brigadier Romeo Macapaz nga miagi sa Lamin Detachment sa Marine Battalion Landing Team 2 (MBLT-2) sa Sitio Kalilangan Barangay Lamin, Barira sa maong probinsiya ang usa ka dumptruck.
Apan tungod kay kadudahan ang panglihok sa mga sakay niini, gipahunong kini sa mga sundalo.
Sa dihang giukay sa mga sakop sa MBLT-2 ang karga sa dumptruck nga puno kaayo og nagkadaiyang klase sa ismagol nga yosi.
Nagkantidad og P17 milyones ang mga smuggled cigarettes nga gipalusot gikan sa Lanao del Sur nga itumod unta sa Maguindanao, Cotabato City, ug North Cotabato.
Walay napakita nga dokumento ang mga suspek resulta nga gidakop sila sa Philippine Marines ug gitunol ngadto sa kapulisan alang sa tukmang kaso nga ipasaka. (Edgar E. Fuerzas)