2 notadong pusher sa Buhangin sikop

NAHULOG na sa kamot sa mga awtoridad ang nailhang alyas Madam ug alyas Bitoy sa Buhangin area atol sa gipahigayong drug buy-bust operation sa Station Drug Enforcement Unit (SDET) sa Buhangin Police Station 5.

Ang operasyon nahitabo ala 1:16 sa udto, Hulyo 18, 2024, sa may HEDJ Taxi Gas, Refilling Station, Brgy. Cabantian, Davao City.

Sumala sa report sa Buhangin PNP, nakuha gikan sa posisyon sa mga dinakpan ang gituohang shabu nga mobalor ngadto sa P42,000.

Kini human nga ang duruha nakig-text sa nagtakuban nga pulis nga mobaligya og shabu, hinungdan nga gikasa ang usa ka drug bust operation.

Giingon nga notadong mga tigpayuhot og ilegal nga druga ang mga naghisgutang suspek sa area sa Buhangin ug sa mga kasikbit nga barangay.

Sa kasamtangan, mga dinakpan gikustodiya sa Buhangin PNP ug giandam na ang kasong paglapas sa Republic Act (RA) 9165 kun Comprehensive Dangerous Drugs Act of 2002 batok kanila. (Jeepy P. Compio)