GIPATAMBALAN sa ospital sa mga sundalo ang duha ka miyembro sa New People's Army (NPA) nga ilang nadakpan alas 2:00 sa hapon, Sabado, Hunyo 21, 2025, sa probinsiya sa Sultan Kudarat.
Mga rebelde giingong sakop sa NPA Sub-Regional Committee (SRC)-Daguma Far South Mindanao Region.
Gibutyag ni 603rd Brigade Commander Brigadier General Michael Santos nga nagpahigayon og pursuit operation ang mga sakop sa 37th Infantry Battalion sa Philippine Army sa Sitio Muagan, Barangay Datu Ito Andong, Kalamansig sa maong probinsiya batok sa mga NPA nga una na nilang na-engkuwentro.
Naabtan sa mga sundalo sa payag ang duha ka NPA nga samaron ug nagpahulay diin nakuha gikan sa ilang posisyon ang usa ka M16 Armalite rifle, mga bala ug magazines.
Kahinumdoman nga nilusad og decisive military operations ang mga sakop sa 37th IB nga gipangulohan ni Lieutenant Colonel Christopherson Capuyan sa Barangay Datu Ido Andong, Kalamansig batok sa mga terorista.
Na-engkuwentro dayon sa mga sundalo ang mga NPA nga gipangulohan ni Eusivio Cranzo alyas Kumander Brix nga nilanat og duha ka oras hinungdan nga nanghikling ang mga sibilyan paingon sa luwas nga dapit.
Miatras ang grupo ni Kumander Brix, biniyaan ang tulo niya ka mga sakop nga
Patay sab sa maong engkuwentro si Corporal JR P. Baay nga taga Barangay Pisan, Kabacan Cotabato Province nga sakop sa 37th IB. (Edgar E. Fuerzas)