PATAY ang duha ka panday human sila gilubngan og daghang bala sa wala pa mailhing mga suspek sa insidente nga natala sa Purok Nido, Barangay New Pandan, Panabo City pasado alas 2 p.m., Lunes, Abril 15, 2024.
Ang mga biktima giila nga sila si Oldarico C. Guisongan, 55 anyos, nga taga Barangay Cagangohan ug Napoleon M. Caresosa, 53 anyos nga taga Barangay New Pandan sa Siyudad sa Panabo.
Suma sa mga nakasaksi nga samtang nagkapuliki sa pagpamanday ang mga biktima, duha ka lalaki ang miabot, nagsuot og itom nga jacket ug nakabonnet samtang nagsakay sa motor.
Way daghang istorya gipusil sa suspek ang duha. Miaksiyon og dagan palayo ang usa sa mga biktima apan nalup-og kini human maigo sa liog. Samtang usa ka biktima ang naigo sa likod, liog, ug agtang.
Blangko pa ang otoridad sa motibo sa pagpusil sa duha ka panday. Nagpadayon ang imbestigasyon sa maong kaso. (RGV)