KIDAPAWAN CITY — BUGTO ang kinabuhi sa duha ka tawo ug usa ang grabe sa drag race alas 12:05 sa udto, Sabado, Pebrero 24 sa probinsiya sa Cotabato.
Giila ang mga nakabsan sa kinabuhi nga sila Genevieve Villela, 42-anyos, negusyante ug nagpuyo sa Barangay Balogo, Pigcawayan, North Cotabato.
Patay sab ang rider nga apil sa drag race nga si John Lloyd, 17-anyos ug nagpuyo sa Aleosan.
Naangol sab si Florante Villela, 44-anyos, negusyante nga bana ni Genevieve.
Matud ni Cotabato Police Provincial Director Colonel Gilberto Tuzon nga nag-drag race ang grupo sa mga kabatan-onan sa national highway Barangay Sinawingan, Libungan, Cotabato.
Tungod sa kakusog sa gimaneho nga Suzuki Raider 150 nga motorsiklo mibangga kini sa topdown nga motor nga gisakyan sa magtiayon nga negusyante.
Dead on the spot si menor de edad nga nasiak ang ulo ug napasok ang iyang motor sa topdown ug nalagpot.
Gisapupo sab dayon ang magtiayon ug gidala sa balay tambalanan apan nabugtuan sa kinabuhi si Genevieve samtang grabe ang iyang bana.
Sa kasamtangan gihingusgan pag-ayo karon sa kapulisan sa Libungan MPS ang operasyon batok sa mga batan-on nga nalambigit sa drag race.