MAG-ATUBANG og kaso nga Illegal possession of firearms o Republic Act 10591 ang duha ka sakop sa Barangay Peacekeeping Action Team (Bpat) nga nadakpan sa mga awtoridad alas 12:40 sa udto, Miyerkules, Agosto 14, 2024, sa Maguindanao del Norte.
Giila ang mga suspek nga sila Bassir Abdullah, 34-anyos, minyo ug Ronnie Alagasi, 38, minyo, molupyo sa Barangay Magsaysay, Parang, Maguindanao del Norte.
Gibutyag ni Parang Chief of Police, Lieutenant Colonel Erwin Tabora, nga nagpahigayon sila og Intel Driven Operation sa dihang nasiplatan ang duha ka Bpat nga nagdala og mga tag-as nga matang sa armas duol sa ilang gipuy-an.
Gisita dayon sa mga pulis ang mga suspek ug gipangitaan og dokumento sa ilang mga dala nga armas apan pakyas hinungdan nga gipangdakop dayon ug gibalhog sa prisohan. Mga armas nga nakuha gikan kanila mao ang duha ka M16 armalite rifles, magazines ug mga bala.
Gikanayon ni Tabora nga ang duha ka Bpat security escort sa usa ka politiko. (EEF)