DUHA ka nikuha og pasulit gikan sa Davao City nalakip sa unang napulo (top 10) sa bag-ohay lang nga gihimong Chemical Engineers Licensure Examination niadtong Oktubre 14 hangtu 16, 2023.
Subay sa mga resulta nga gipagawas sa Professional Regulation Commission (PRC) niadtong Oktubre 20, si Allen Louis Tan Orot gikan sa University of Mindanao (UM-Davao) nahiluna sa ika-4 nga puwesto uban sa grado nga 87.30 porsiyento, ug Neal Audrey Longakit Estrelloso gikan sa Ateneo de Davao University (Addu) nga naa sa ikalima uban sa grado nga 86.70 porsiyento.
Nahan-ay sab ang Addu nga maoy ikaunom sa nag-unang "performing schools" sa nasud alang sa maong eksaminasyon, nga dunay 31 ang nipasar sa 38 nga mikuha sa eksam, o 81.58 porsiyento nga "passing rate".
Samtang alang sa educational institutions nga nakabase sa Davao City, ang UM-Davao dunay 68.97 porsiyento nga "passing rate", 20 ang nipasar sa 29 nga nikuha sa eksam, samtang ang Mapua Malayan Colleges Mindanao nga dunay usa nga nikuha sa eksam, nipasar sab.
Ang unang puwesto, nga dunay grado nga 90 porsiyento, nakuha ni Robby Andre Tan Ching, ni-eksam gikan sa De La Salle University, nga nakakuha og 90.00 porsiyento nga grado.
Gitaho sab sa ahensiya nga 651 sa 927 nga kandidato nipasar sa Chemical Engineers Licensure Examination nga gihatag sa Board of Chemical Engineering sa National Capital Region (NCR), Baguio, Cagayan de Oro, Cebu, Davao, Iloilo, Legazpi, ug Rosales niadtong Oktubre 2023.