COTABATO CITY -- Giingong biktima sa summary execution ang duha ka mga tawo nga nakit-ang patay alas 7:00 sa buntag, Martes, Hunyo 17, 2025, sa Datu Anggal Midtimbang, Maguindanao del Sur Province.
Ang duruha ka mga patay nga lawas sa tawo giila nga sila alyas Rasul ug alyas Maguid.
Sumala ni Maguindanao del Sur Police Provincial Office (MDSPPO) Director Ryan Bobby Paloma nga mismong ang mga sibilyan ang nagtaho ngadto sa kapulisan sa patay nga lawas sa mga biktima.
Nakaplagan ang mga patay nga lawas daplin sa kalsada sa Datu Anggal Midtimbang nga nakaangkon og mga samad pinusilan nga maoy hinungdan sa ilang kamatayon.
Gihulagway nga mga biktima gihigtan og nylon cord ang mga kamot ug tiil niini samtang giplastiran ang ilang mga baba.
Sa wala pa makaplagi ang mga biktima, dunay nasiplatan ang pipila ka mga molupyo sa dapit nga sakyanan.
Padayon ang imbestigasyon sa kapulisan sa Datu Anggal Midtimbang Municipal Police Station aron nga matugkad ang motibo sa pagpatay sa mga biktima. (Edgar E. Fuerzas)