NAKAPLAGAN nga wala nay kinabuhi ang duha ka mga lalaki kinsa giingong nabanggaan sakay sa ilang motorsiklo ug gibiyaan sa dalan alas 6:00 sa buntag, Huwebes, Hulyo 24, 2025, sa Matalam, probinsiya sa Cotabato.
Mga biktima naila lang nga sila alyas Lindo ug alyas Michael.
Gibutyag ni Cotabato Police Provincial Office (CCPO) Director, Police Colonel Gilberto Tuzon nga mismong mga sibilyan ang nakakita sa nagbuy-od nga patay nga lawas sa mga biktima kilid sa kalsada sa Barangay Kibudoc, Matalam.
Anaa sab duol sa patay nga lawas sa duha ka batan-on ang ilang gisakyan nga motorsiklo nga nagupok sa pagbangga sa wala matino nga behikulo.
Una nang nikatag ang taho nga biktima sa pagpamusil patay ang duha ka lalaki.
Apan sa dihang gisusi sa mga opisyales sa barangay, nasuta nga ang mga biktima sa na-hit-and- run.
Nag-imbestiga na ang kapulisan sa Matalam Municipal Police Station aron ilhon ang drayber nga nakabangga patay sa mga biktima.
Samtang patay sab ang usa ka tawo samtang laing usa ang naangol sa panagsungag sa sakyanan ug payong-payong alas 5:45 sa hapon, Hulyo 23, 2025, sa Datu Odin Sinsuat, Maguindanao del Norte Province.
Giila ang namatay nga si Rahma Abdullah samtang naangol si Nasser Solaiman, mga nagpuyo sa Barangay Marguez, Datu Odin Sinsuat sa maong probinsiya.
Matud ni Datu Odin Sinsuat Municipal Councilor Datu Rahib Diocolano nga nagdagan ang SUV nga gimaneho sa usa ka Dr. Ato paingon sa Cotabato City, apan pag-abot sa Barangay Margues dunay gikasugat kining motorsiklo nga nag-overtake hinungdan nga nilikay kini hinungdan nabangga sa mga sakay sa payong-payong nga nagparking kilid sa national highway.
Gisapupo ang mga naangol sa nakasaksing mga tawo sa dapit ug gihatud ngadto sa Cotabato Regional and Medical Center (CRMC) apan namatay si Abdullah samtang grabe si Solaiman nga drayber sa payong-payong.
Boluntaryo sab nga nitahan ngadto sa kapulisan sa DOS Municipal Police Station si Dr. Ato nga posibleng mag-atubang og kaso. (Edgar E. Fuerzas)