2 ulitawo nagsinumbagay; 1 giluba

GIENDORSO ngadto sa buhatan sa kapulisan ang lalaki nga gituohang maoy nidunggab sa iyang kasumbagay sa Purok 1, Barangay Camansa, Asuncion, sa Davao del Norte alas 7:10 sa buntag, Dominggo, Agosto 4, 2024.

Ang suspek giila nga si Roland Fronteneras Mencidor, 56-anyos, ulitawo samtang ang biktima nailhan nga si Zacharias Mencidor Inte Jr., 50-anyos, ulitawo, parehong molupyo sa nahisgutang lugar.

Subay sa report, nasayran nga mga kagawad nga sila Elizalde Abad ug Felix Abiao, Jr. sa Barangay Camansa sa lungsod personal nga midangop sa Asuncion Municipal Police Station, uban sa mga tanod, ug gitunol ang suspek nga si Mencidor kinsa giingong maoy responsable sa pagpangluba sa maong dapit.

Base sa inisyal nga imbestigasyon ug sa saysay sa nahisgutang mga kagawad nga sa dihang nasayran nga dunay nagsinumbagay sa nahisgutang dapit, gilayon nilang giadtoan ang lugar uban sa mga tanod.

Maoy ilang naabtan ang suspek ug ang biktima nga parehong nagbuy-od sa lugar human sa giingon nilang pagsinumbagay.

Sumala pa nga sa dihang nahitabo ang sinumbagay, wala pay samad sa lawas ang biktima. Apan giingong paglabay og usa ka oras, nasayran nga ang biktima nabulit na ang lawas niini og mga samad dinunggaban hinungdan nga gidali pagdala ngadto sa Kapalong District Hospital.

Apan wala madugay, gibalhin sab siya ngadto sa Davao Regional Medical Center sa Siyudad sa Tagum gumikan kay talandugon ang kahimtang.

Gikustodiya na ang suspek sa Asuncion MPS alang sa posibleng kasong ipasaka batok kaniya. (DTV)