ANG kapulisan sa Davao City Police Office (DCPO) partikular sa San Pedro Police Station nagpahigayon na og makuti nga imbestigasyon may kalabutan sa usa ka 2-weeks old nga baby boy nga giingong gikawat sa wa mailhing babaye ala 1 sa hapon, Sabado, Pebrero 17, 2024 sa Centennial Park, San Pedro Street, Davao City.
Ang mga sakop sa San Pedro PNP sa pagpanguna sa station commander, Police Major Marvin Hugos daling mihimog plano alang sa usa ka imbestigasyon labot sa hitabo.
Subay sa report nasayran nga samtang anaa sa Centennial Park ang 26-anyos nga si Jessa Mar Cumablay taga New Lagog, Barangay Marilog, Marilog District, ning siyudad, bitbit ang iyang 2-weeks old nga baby, usa ka wa mailhing babaye ang iyang giduol ug gihangyo nga ibilin usa niya ang iyang baby kay mopalit siya og tubig.
Sa iyang pagbalik, wala na ang maong babaye, nga iyang gihulagway nga payat, naka-maong og shorts ug naka sling bag.
Sa pagsuwat ning balita Pebrero 18 sa hapon, wala pa nagpagawas og report ang kapulisan labot sa hitabo.