KIDAPAWAN CITY -- Pasakaan og kaso nga kalapasan sa Republic Act (RA) 10591, o Comprehensive Firearms and Ammunition Regulation Act, ug RA 9516, o Comprehensive Dangerous Drug Act of 2002, ang usa ka ulitawo human madakpi nga nagdala og eksplosibo, mga bala ug shabu sa mga awtoridad alas 7:00 sa gabii, Dominggo, Mayo 5, 2024, sa Kabacan, probinsiya sa Cotabato.
Ang suspek mao si alyas Moha, 20 anyos ug nagpuyo sa Barangay Poblacion, Pikit, Cotabato Province.
Matud ni Kabacan chief of police, Major Maxim Peralta, nga nagpahigayon sila og joint checkpoint operation, uban ang mga sakop sa Regional Mobile Force Battalion (RMFB-12) sa Brgy Katidtuan, Kabacan.
Giingong pag-agi sa suspek sa PNP checkpoint, ila dayon siyang gisita ug gikapkapan hinungdan nga nakuha gikan sa posisyon niini ang usa ka granada, 2 ka bala sa 9mm pistol ug pakite sa shabu.
Sa wala pa madakpi ang suspek, una nang nakadawat ang mga awtoridad og intel report bahin sa gimaneho niini nga kinawat nga motorsiklo.
Balhog na sa prisohan sa Kabacan Municipal Police Station ang suspek ug gitakda nga itaral sa korte tungod sa mga kasong giatubang. (Edgar E. Fuerzas)