MAG-ATUBANG og kasong kalapasan sa Republic Act 9165 o Comprehensive Dangerous Drug Act of 2002 ang ulitawo nga nagpangedaron pa lang og 20-anyos human madakpi sa mga pulis sa buy-bust alas 9:15 sa gabii, Lunes, Abril 7, 2025, sa General Santos City.
Giila ang suspek nga si alyas Akmad, estudyante, ug nagpuyo sa Purok 3 Batutitik, Barangay Batomelong, General Santos City.
Matud ni General Santos City Police Office (GSCPO) Director, Police Colonel Nicomedes Olaivar Jr. nga nagpahigayon og buy-bust ang kapulisan sa Aradaza Street, Barangay Lagao sa dakbayan.
Atol nga gitunol ni alyas Akmad ang shabu ngadto sa PNP undercover agent, dali siyang gidakop.
Narekober sa suspek ang pakite sa shabu, drug paraphernalia, buy-bust money ug mga personal nga kagamitan.
Nasayran nga dugay na nga gipanid-an sa mga pulis ang suspek nga nagpayuhot sa gidiling druga.
Balhog na si alyas Akmad sa prisohan sa kapulisan samtang maghuwat sa kasong ipasaka kaniya ngadto sa korte. (Edgar E. Fuerzas)