MIKAGIW ang dul-an baynte ka mga crew sa usa ka motorized banca nga nagdiskarga og mga ismagol nga sigarilyo niadtong Hunyo 7, 2025 sa Dumoy Point, Talomo, Davao City.
Sa report gikan sa Naval Forces Eastern Mindanao (NFEM), malampuson nga nakumpiska sa Naval Task Force 71 ang usa ka motorized banca nga M/B Sharefa nga dunay daghang kinarton sa gituohang mga ismagol nga mga sigarilyo.
Dugang impormasyon nga gipadangat ngadto sa mga media ni Lieutenant Commander (LCDR) Reynante Villela, Public Affairs Officer sa NFEM nga anaa sa 800 master cases sa undocumented foreign-brand sa sigarilyo nga gibana-banang mokantidad sa P20,000,000 ang ilang nasakmit.
Nasayran nga anaa sa 20 ka mga crews ang nakita sa awtoridad atol sa gihimong maritime patrol nga nagdiskarga og mga kinarton nga sigarilyo gikan sa banca padulong sa baybayon.
Dihang gisuta sa awtoridad ang gitouhang mga kontrabando, giingong paspas nga nakaikyas ang anaa sa 20 ka mga crews.
Sa kasamtangan ang mga kontrabando anaa sa Naval Station Felix Apolinario sa Panacan, Davao City samtang nagpadayon ang gilusad nga inspeksiyon sa mga nasampit nga kontrabando. (Jeepy P. Compio)