200 kahoy nga giputol wa ikalipay

DISMAYADO ang usa ka grupo sa makakalikopan nga nakabase sa Davao City tungod sa pagpamutol sa kapin 200 ka kahoy sa may Lanang ning siyudad aron nga hatagan og dalan ang Samal Island-Davao City Connecter (SIDC) Project.

Gisulti ni Atty. Mark Peñalver, executive director sa Interfacing Development Interventions for Sustainability (Idis) ngadto sa SunStar Davao kagahapon, Dominggo sa buntag, Mayo 12, 2024, nga tungod ang heat index moabot 40 hangtud 45 degrees Celsius, “every tree counts.” Apan way suwerte kay ang pagguba sa kinaiyahan gihimong katarungan alang sa katuyoan sa pag-uswag.

Gipadayag ni Peñalver nga matag usa tinguha ang kauswagan apan angay nga maayo kini sa kalikopan Matud niya nga ang mga kahoy sa siyudadnon bililhon kaayo aron nga makatabang sa pagsuyop sa kontaminado nga hangin, mohatag og natural nga bugnaw aron nga makubsan ang pagtaas sa kainit sa siyudadnon.

Ang nakapait pa gyud niini kay matud sa direktor nga ang City Government of Davao dunay local ordinance number 0784-21 series of 2021, labing nailhan isip Heritage Ordinance, nga nagtumong sa pagpreserba sa kahoy nga bililhon sa siyudad ug sa kalikopan.

Ang mga kahoy nga gipamutol mao ang Mahogany ug giingong maayo kining kahoya pamutlon kay di kini benepisyal sa ecosystem. Apan giklaro ni Peñalver nga kung ang publiko mosunod niini nga argumento, nagpasabot lang kini nga “sige mananom na lang ta'g Mahogany or exotic trees sa urban area para ma-justify if putlon nato ang mga kahoy puhon kung naa na sad mosulod nga project.”

Bisan unsa man kini, Mahogany man o uban pang matang sa kahoy, makatabang gihapon sila sa kalikopan sa pagkombati sa polusyon sa hangin ug makakubos sa kainit sa panahon.

Giawhag niini ang local government units sa Davao ug Samal nga imbestigahan ang proyekto ug lantawon og balik ang mga plano. Gipasalig ni Peñalver nga ang IDIS padayon nga magpakusog sa kaamgohan bahin sa mga epekto sa tulay ngadto sa kalikopan ug katawhan. (Rojean Grace Patumbon)