GIPAHIBALO sa Department of Labor and Employment-Davao Region (DOLE-Davao) nga maghanyag sila og mga 2,000 bakanteng trabaho sa Kalayaan Job Fair sa Hunyo 12, 2025.
Gikanayon ni Abogado Randolf Pensoy, regional director sa DOLE-Davao, nga dunay kinatibuk-ang 2,453 ka bakanteng trabaho alang sa job fair. Sa maong ihap, 1,399 mga lokal oportunidad sa trabaho, samtang 1,054 trabaho sa langyaw'ng kabaybayonan. Dugang pa niini nga mga 680 aplikante naka-pre-registered na.
“This coming June 12 DOLE will have simultaneous activities or a job fair and we also have some DOLE programs which are flagship programs of the livelihood,” tug-an niya atol sa Kapehan sa Dabaw, Lunes sa buntag, Hunyo 9, 2025, sa SM City Davao.
Ang unang napulo nga posisyon nga lokal nga nakalaray sa job fair mao ang Customer Support Staff/Service Representatives (BPO), Cashiers/Tellers, Customer Service Assistants/Frontdesk Clerks, Bagger, Service Crew/Waiter, Heavy Equipment Mechanic, Hydraulic Mechanic, Heavy Equipment Driver (Backhoe/Dumptruck), Production Workers, ug Civil Engineering Positions.
Samtang ang unang lima ka bakanteng trabaho nga overseas mao ang branch manager, waiter, welder, registered nurse, ug security guard. Ang mga destinasyon sa gawas sa nasud naglakip sa United Arab Emirates (UAE), Saudi Arabia, Bahrain, Croatia, ug Japan.
Si Suzette Jane A. Antiveros, focal person sa regional employment program sa DOLE-Davao, nagkanayon nga ang nagtakda sa edisyon karong tuiga sa Kalayaan Job Fair mao ang paglakip sa job opportunities alang sa high school ug senior high school graduates o kadtong nakaabot og high school-level education uban ang mga 886 ka bakante nga gihanyag sa napulo ka mga kompaniya.
“We are happy to announce duna natay [that we have] job vacancies nga nakuha sa kandalahi-lahing mga [that we have different] employers offering positions for high school and senior high,” pahayag niya.
Gitaho sa DOLE-Davao nga kung itandi sa niaging tuig nga edisyon sa Kalayaan Job Fair, ang ihap sa mga bakanteng trabaho nikubos—gikan 4,377 sa 2024 ngadto sa 2,453 sa 2025. Niadtong 2024, dunay 730 registered job seekers, kon diin 487 niini kuwalipikado, 145 niini hapit makuha (near-hired), ug 83 hired on the spot (Hots).
Kahinumdoman, atol sa ilang Mayo 1, 2025, job fair, nihanyag ang DOLE og mga 6,741 bakanteng mga trabaho, kon diin 638 kuwalipikado nga mga job seekers, 257 hapit makuha nga mga aplikante, ug 249 Hots. (Rojean Grace G. Patumbon)