KAPIN 232,880 ka mga tawo ang nabakunahan batok tipdas o 17 porsiyento sa kinatibuk-ang target sa Ministry of Health sa Bangsamoro Autonomous Region in Muslim Mindanao (MOH-Barmm) sa nagpadayon nga pagbakuna batok tipdas nga nagsugod Abril 1.
Matud ni MOH Deputy Minister Zul Qarneyn Abas, sa pinakauwahi nga datos sa ahensiya, 848 ka kaso sa tipdas ang natala sa Barmm sugod bulan sa Enero.
Ang Maguindanao del Norte ang adunay pinakadaghang kaso.
Gidugang ni Abas, hagit gihapon sa mga health worker ang pipila ka mga ginikanan nga dili gustong magpabakuna sa ilang mga anak tungod sa kahadlok.
Bisan pa niini, positibo si Abas nga maabot sa Health Ministry ang 1.3 milyones ka bata nga target nga mabakunahan batok tipdas sa rehiyon.
Mitabang na sab ang mga LGUs sa pagpasabot sa katawhan kung unsa ka importante ang bakuna. (Edgardo E. Fuerzas)