26 ex-NPA ni-aplay og amnestiya

MOABOT sa 26 ka kanhi mga rebeldeng New People's Army (NPA) ang ni-aplay alang sa amnesty program sa kagamhanang probinsiyal sa Davao Oriental niadtong Miyerkules, Agosto 7, 2024, sa Mati City.

Ang tulo ka adlaw nga Amnesty Program Workshop, nahitabo gikan Agosto 5 hangtud 9, 2024, gitambongan sa 26 ka mga kanhi rebelde aron nga makaaplay sa programa.

“Pag-prioritize sa peace and order programs sa probinsiya aron mamentinar ang inclusive environment alang sa tanan pinaagi sa mga peace-building efforts sa kagamhanang probinsiyal nga maghatag og dala alang kanila nga mahiusa pag-usab ug mahatagan sila og access sa socio-economic services sa gobyerno,” suwat sa kagamhanang probinsiyal sa ilang Facebook niadtong Agosto 9.

Gikanayon ni Rod John Pandili, Provincial Ending Local Communist Armed Conflict (Elcac) Action Officer nga kini mao ang unang higayon nga dunay dinaghan nga pag-aplay nga mga kanhi rebelde ngadto sa local government unit (LGU).

Dugang pa niini nga ang Davao Oriental nagpabilin nga usa sa mga probinsiya nga dunay taas nga ihap sa mga rebelde kinsa nipahimulos sa ilang kaugalingon sa amnesty program.

Si Carla, usa sa mga kanhi rebelde, nagpadayag sa iyang pasalamat atol sa Amnesty Program Workshop nga gipasiugda sa 701st Kagitingan Brigade sa Philippine Army alang sa pagtabang kaniya bisan sa iyang kagahapon isip rebelde.

“Gikan sa pag-surrender namo hangtud sa pag-process, makadawat mi og mga hinabang sa gobyerno, dako mi og pasalamat kay wala mi, wala mi gibiyaan. Nakasala man mi sa katilingban, nakasala man mi sa katawhan, sa gobyerno, naa gihapon ang tabang. Kining amnesty program dako gyud tabang sa amoa,” pagpasabot niya.

Sumala sa taho sa 701st Brigade, mga 20 ka aplikante hingpit nang nakompleto. Ang mga dokumento susihon sa National Amnesty Commission. Ila sab nga gidasig ang mga kanhi rebelde nga dunay nakaung-ong nga kasong kriminal nga mo-aplay alang sa amnesty program, kay duna lay duha ka tuig nga "window to apply". Kadtong interesado, mahimong makabisita sa LGU-Davao Oriental o Davao Oriental Police Provincial Office. (Rojean Grace G. Patumbon)