NANGHIKLING ang mga sibilyan sa nahitabong binakbakay tali sa militar ug armadong grupo alas 8:15 sa gabii, Huwebes, Hunyo 5, 2025, sa Talitay, Maguindanao del Norte.
Sumala kang 1st Mechanized Infantry Battalion Commander Lieutenant Colonel Roberto Betita nga nakadawat sila og taho sa mga armadong lalaki nga nagpinusilay sa Barangay Poblacion, Talitay sa maong probinsiya.
Abtik nga nagresponde ang mga sundalo aron nga mapanalipdan ang mga sibilyan sa maong lugar.
Apan gibaputhan ang mga sakop sa Ist Mechanized Battalion hinungdan nga napugos sila sa pagbalos.
Tulo sa mga suspetsado ang giingong naangol samtang misibat ang ilang ubang mga kauban.
Narekober sa militar gikan sa mga dinakpan ang mga tag-as nga matang sa armas, shabu ug drug paraphernalias.
Samtang gihatud sa mga sundalo ang mga naangol ngadto sa Cotabato Regional and Medical Center (CRMC) sa Cotabato City ug pagkahuman gitunol ngadto sa kapulisan.
Gihingusgan pa sa Ist Mechanized Battalion ang paglutos sa mga terorista nga nakaikyas. (Edgar E. Fuerzas)