NA-RESCUE National Bureau of Investigation Southeastern Mindanao Regional Office (NBI) Davao ang tulo ka mga babaye nga gituohang biktima sa "human trafficking" sa Francisco Bangoy International Airport.
Sumala sa report, na-rescue sa NBI XI ang tulo ka biktima nga plano mobiyahe padulong Singapore pinaagi sa Scoot Airlines human makadawat og intel nga sila biktima sa trafficking.
Giingon ni NBI-Davao director Atty. Arcelito Albao nga ang mga biktima gi-recruit sa usa ka alyas Lalay ug Merla aron mahimong entertainers sa gawas sa nasud.
Napugngan ang scheme human ang mga biktima, imbis mosunod sa instruksiyon sa ilang recruiters nga mo-approach sa giingon nga immigration officers, nangayo sila og tabang gikan sa lain nga personnel, nga nakapukaw sa atensiyon.
Nakit-an dayon sa mga immigration officers ang mga dili tugmang detalye sa ilang mga travel documents.
Gisugid sa NBI nga mibayad ang mga biktima kang Lalay para sa pagproseso sa ilang employment papers. Gipadayon karon sa NBI ang imbestigasyon sa posible ug alegasyong koneksiyon sa mga immigration personnel sa kaso.
Ang tulo ka mga babaye gi-turnover na sa Department of Social Welfare and Development (DSWD) alang sa pag-atiman ug counseling.
Reklamong kriminal ang ipasaka batok sa mga recruiters may kalabutan sa Republic Act No. 10364, ang Expanded Anti-Trafficking in Persons Act of 2012. (Jeepy P. Compio)