3 bala sa mortar nakit-an

ANAA na sa pag-amping sa tinugyanan sa balaod ang tulo ka mga bala sa mortar nga nakita sulod sa sako sa mga nangolekta og basura sa Barangay Centro, Agdao District, Davao City alas 10:00 sa buntag, Biyernes, Agosto 16, 2024.

Nasayran nga alas 12:20 sa udto sa maong adlaw, ang Sta. Police Station nakadawat og taho sa giingong tulo ka mga bala sa mortar nga nakita sa Barangay Hall sa Centro, Agdao District ning siyudad. Busa nagpadala gilayon og mga pulis sa lugar aron nga susihon ang taho.

Nasayran, base sa gihimong imbestigasyon, nga tinuod ang nakitang mga bala.

Sumala pa nga buntag sa maong adlaw, usa ka kagawad sa maong barangay uban ang lain pang kaubanan nagsugod na'g panghipos og mga basura palibot sa lugar gamit ang multicab sa barangay.

Apan bandang alas 10:00 sa buntag sa mao gihapong adlaw, sa dihang sa ilang pagbalik sa Barangay Hall sa Centro, ug samtang naglain-lain sa nakolektang mga basura, ilang nakita sulod sa sako ang tulo ka wala pa mibuto nga bala sa mortar.

Niabot sab sa lugar ang K9 Unit team pangulohan ni Police Major Sergeant Emmanuel Iyog ug mainampingon nga gitunol ngadto kanila ang mga bala sa mortar alang sa saktong disposisyon. (Wenz G. Mendoza)