HALOS 200 ka pamilya ang namakwit human matugaw sa engkwentro sa mga sakop sa Moro Islamic Liberation Front (MILF) 118th Base Command ug Bangsamoro Islamic Freedom Fighters (BIFF) alas 7 sa hapon, Martes, Abril 9 sa Barangay Dasikil, Mamasapano, Maguindanao del Sur.
Suma ni Mamasapano Municipal Disaster and Risk Reduction Management Office Officer Vincent Cuales, ang mga pamilyang nahadlok nga mapagan sa giyera dali nga namiya sa ilang panimalay, ug karon giatiman na sa lokal nga gobyerno.
Sumala ni Cuales nga nagsugod ang away sa Barangay Pimbalakan Mamasapano, diin duha ka sibilyan ang samdan sa pinusilay sa magbangi nga grupo gumikan sa dumot sa pamilya o rido.
Sa taho sa Provincial Disaster Office, mga apektadong barangay mao ang Brgy Pimbalakan, Tukanalipao ug Daladap sa lungsod sa Mamasapano.
Giangkon ni Cuales nga bisan og nagpatunga na ang MILF CCCH ug Ad Hoc Joint Action Group (AHJAG) ug adunay ceasefire, naglisod gihapon ang LGU sa pagkontrolar sa rido.
Lokal nga kagamhanan ug uban pang grupo gitakdang mo-apod-apod og hinabang ngadto sa mga bakwit.