3 barangay sa Davao Region 'drug-cleared'
SA PADAYONG paningkamot sa pagkombati sa ilegal nga druga ug pagpromotar sa luwas nga mga komunidad, tulo pa ka mga barangay sa Davao Region ang opisyal nang gideklara isip drug-cleared, subay sa gipahibalo sa Davao Anti-Drug Abuse Council (Dadac) conference nga gipahigayon sa Hulyo 24, 2025, sa Davao City Recreation Center sa Quimpo Boulevard.
Sa paghinabi uban sa DXDC RMN Davao, giila ni Philippine Drug Enforcement Agency-Davao Region (PDEA-Davao) spokesperson Noli Dimaandal ang bag-ong nasertipikahan nga mga barangay nga mao ang 25-C ug San Isidro sa Bunawan District, nga pulos nahimutang sa Davao City, ug Barangay Cadunan sa Mabini, Davao de Oro.
Gitug-an ni Dimaandal nga ang pagdeklara nahitabo human ang subsob nga evaluation process aron madeterminar ang kawala nay kalihukan sa ilegal nga druga ug ang presensiya sa malahutayong anti-drug programs sulod sa mga komunidad. Iyang gipahimug-atan nga ang validation process naglakip sa pagpuhag sa giilang mga drug dens, pag-aresto sa mga personalidad sa druga, clearance gikan sa drug-affectation status, ug pag-establisar sa aktibong rehabilitation initiatives nga nakabase sa komunidad.
Uban sa nadugang, ang Davao City naau 109 sa 182 ka barangay karon nga gideklara nga drug-cleared. Sa tibuok rehiyon, 990 sa kinatibuk-ang 1,162 ka barangay sa Davao Region nakaangkon na sa drug-cleared status.
Ang opisyal sa PDEA nagbutyag sab nga daghan pang mga barangay sa tibuok rehiyon nakasumite na sa ilang mga dokumentayon ug kasamtangan karon nga nagpailawom og assessment. Daghan kanila aktibong nagpaningkamot aron nga matubag ang "stringent requirements" nga gitakda sa Dangerous Drugs Board (DDB) ug PDEA alang sa usa ka barangay aron nga opisyal nang madeklara nga luwas na gikan sa illegal drugs.
Dugang gidayeg ni Dimaandal ang mga lokal nga opisyales ug barangay anti-drug abuse councils alang sa ilang mga paningkamot sa pagmentinar sa kahapsay ug kalinaw ug nagseguro sa malahutayong anti-drug programs.
Gidapit sa Dadac conference ang daghang mga hingtungdan gikan sa "law enforcement agencies, local government units, and civil society" aron hisgutan ang mga estratihiya sa pagsustiner sa drug-cleared nga mga komunidad ug pagpalig-on pa sa "preventive education and rehabilitation programs".
Ang drug-clearing program maoy kabahin sa gipalig-on nga kampanya sa gobyerno ubos sa Barangay Drug Clearing Program (BDCP), nga gipaimplementar sa tibuok nasud aron pagseguro nga ang mga komunidad sa kabarangayan gipagamhan aron pagpugong sa pagbalik og sulbong sa mga ilegal nga aktibidad sa druga. (David Ezra Francisquete)