TULO ka mga suspetsado ang nadakpan diin 12 ka gramo sa gituohang illegal nga druga ang nakumpiska atol sa ka buy-bust nga gihimo sa Philippine Drug Enforcement Agency (PDEA) Davao.
Ang operasyon gipangunahan sa PNP Special Enforcement Group - Special Operations Unit 11 ug Police Precinct 15 - Ecoland Police Station nga nahitabo sa Kamias Street, Phase 7, Dona Asuncion Village, Pampanga, Davao City, Hunyo 20, 2025.
Ang suspetsado giilang alyas Joey, 48-anyos, nga gituohan nga tigdumala sa drug den, nadakpan human mibaligya og usa ka pakite sa gituohang shabu nagkantidad og P8,000 ngadto sa usa ka undercover agent nga pulis.
Dugang niini, duha pa ka tawo nga ginganla'g alyas Josephine, giingong trabahante sa drug den, ug alyas Aeron, usa ka bisita sa maong lugar ang nadakpan.
Nakumpiska sa mga awtoridad ang upat ka pakite sa gituohang shabu nga may gibanabanang gibug-aton nga 11 ka gramo nga nagkantidad og P74,800, apil na dinhi ang nagkalain-laing drug paraphernalia ug ang marked money sa operation.
Ang mga suspetsado nag-atubang ang paglapas sa Republic Act 9165 o ang Comprehensive Dangerous Drugs Act of 2002. (Glae Ann Richardson, SPAMAST Intern)