3 nagkulata sa hubog, giposasan

NAGISI ang nawong sa hubog human gitabangan og kulata sa tulo ka mga lalaki diin ang usa kanila menor de edad human nanghagit og sinumbagay kanila.

Ang insidente nahitabo alas 11:55 sa gabii, Agosto 20, 2024, sa Balusong, Matina Crossing, Davao City.

Nailhan ang biktima nga si alyas Mark, 24-anyos, laborer ug residente sa #490 Tahimik Avenue, Matina, Davao City samtang ang tulo ka suspek mao sila alyas Tirso, 23-anyos, alyas Ashley, 20-anyos ug usa ka menor de edad kinsa pulos nagpuyo sa nasampit nga dapit.

Nasayran nga hubog ang biktima kinsa pauli na unta sa ilang balay ug nasugatan niya ang tulo ka suspek dayon iya, suma pa, silang gihagit og sumbagay.

Wala nagduha-duha ang mga nahisgutan, giayo'g kulata ang biktima hinungdan nga nakaangkon kini og daghang samad-kinulatahan sa nawong.

Sa kapaspas nga miresponde sa mga pulis, daling nasikop ang duha ka suspek ug na-rescue ang usa ka menor de edad.

Miabot sab dayon ang Ambulance 01 sa Central 911 ug gidala ang biktima sa Southern Philippines Medical Center (SPMC).

Giandam na ang posibleng kaso nga ipasaka sa mga suspek sa korte. (JPC)