GISANG-AT na ang kaso batok sa tulo ka suspek nga nilabay og granada sa Sto. Nino Chapel sa Barangay Rosary Heights sa siyudad niadtong Domingo, Mayo 19, 2024.
Matud ni Cotabato City Police Office director Colonel Querubin Manalang nga usa sa mga suspek maoy "lookout" samtang laing usa maoy nilabay sa granada. Ang laing usa pa mao ang drayber sa motorsiklo nga gigamit sa ilang pagsibat.
Mga suspek giingong nailhan sa mga pulis pinaagi sa hulagwa sa closed-circuit television (CCTV) camera apil na ang pahayag sa mga saksi dihang nahitabo ang pagbusikad sa granada.
Giingon nga mga suspek pulos taga Cotabato City.
Gipahayag ni Manalang nga minor injuries lang ang nahiaguman sa duha ka mga biktima tungod kay low order of detonation ang buto o wala nahurot ang sulod sa M26 grenade busa dili kaayo dako ang kadaut nga namugna niini.
Kahinumdoman nga nagpagawas og reward money si Mayor Bruce Matabalao sa mga tawo nga makaila ug makatudlo sa mga suspek nga nilabay og granada sa kapilya atol sa Sunday Bible service sa pagpanguna sa "kaabag" o Extra Ordinary Ministers of the Holy Communion.
Hinuon, padayon pang gipangita kapulisan ang tulo ka mga suspek aron nga sikupon. (Edgar E. Fuerzas)