GENERAL SANTOS CITY -- Patay ang usa ka lalaki nga giingong nangawat og pinya samtang laing duha ang naka-eskapo human nisukol sa mga sekyu alas 6:15 sa buntag, Lunes, Hulyo 7, 2025, sa Tupi, South Cotabato.
Giila ang namatay nga si alyas Prem kinsa taga Barangay Polonuling, Tupi samtang ang nakasibat niyang kauban giilang sila alyas Dindo ug alyas Mael.
Sa taho sa Tupi Municipal Police Station, nasayran nga nasiplatan sa mga sekyu sa usa ka pineapple plantation ang mga suspek nga nangawat og pinya sa Sitio Capareda, Barangay Acmonan sa maong lungsod.
Gihulagway nga gikarga sa mga kawatan ang kinawat nilang pinya sa giabangan nilang pick up ug pasibat na unta sa dihang naabtan sa mga sekyu.
Daling gibabagan sa mga sekyu ang mga suspek ug gikomprontahi apan nisulay og sukol sa alyas Prem hinungdan nga gipusil ug namatay.
Abtik sab nga nikaratil og dagan ang iyang duha ka mga kauban, biniyaan ang pick-up ug usa ka motorsiklo.
Gisubay na sa mga pulis Tupi Municipal Police Station ang nanibat nga mga suspek. (Edgar E. Fuerzas)