3 naposasan sa pagkapuhag sa drug den

KASONG kalapasan sa Republic Act 9165 o Comprehensive Dangerous Drug Act of 2002 ang atubangon nga kaso sa tulo ka tawo nga naposasan tungod matud pa sa pagmentinar og drug den nga gironda sa mga awtoridad alas 8:20 sa gabii, Huwebes, Agosto 8, 2024, sa Cotabato City.

Ang mga naaresto mao sila alyas Butyok, alyas Yeng ug alyas Dats, mga molupyo sa Malagapas, Barangay Rosary Heights 10, Cotabato City.

Gibutyag ni Cotabato City Police Office Director Colonel Joel Estaris nga gironda sa mga sakop sa Philippine Drug Enforcement Agency-Bangsamoro Autonomous Region (PDEA-BAR) ang gipuy-an sa mga suspek nga gihimo matud pa nilang drug den o salag sa mga adik.

Wala na makalihok ug makaikyas ang mga suspek human nga napalibotan na ang ilang nahimutangan sa mga awtoridad.

Narekober sa mga sakop sa PDEA-BAR sulod sa drug den ang mga drug paraphernalias ug 1.5 gramos nga shabu nga nagkantidad og P102,000.

Gikanayon ni PDEA-BAR Agent Anthony Naive nga dugay na nila nga gipanid-an ang ilegal nga kalihukan sa mga suspek ug sa katapusan natiklo ra gayud.

Balhog na ang mga suspek sa prisohan sa PDEA-BAR ug naghulat kung kanus-a bistahon ang giatubang nilang kaso. (EEF)