TACURONG CITY -- Gilutos karon sa 603rd Brigade sa Philippine Army ang mga sakop sa New People's Army (NPA) nga una nilang na-engkuwentro alas 2:00 sa kaadlawon, Huwebes, Hunyo 19, 2025, sa Kalamansig, probinsiya sa Sultan Kudarat.
Atol sa engkuwentro, tulo ka mga giingong miyembro sa NPA ilawom sa Sub-Regional Committee (SRC) - Daguma Far South Mindanao Region.
Gawas niini, napatay sab ang usa ka sakop sa 37th Infantry Battalion, PA.
Sumala kang 603rd Brigade Commander Brigadier General Michael Santos nga nagpahigayon og decisive military operations ang mga sakop sa 37th IB nga gipangulohan ni Lieutenant Colonel Christopherson Capuyan sa Barangay Datu Ido Andong, Kalamansig, Sultan Kudarat Province.
Na-engkuwentro dayon sa mga sundalo ang mga rebelde nga gipangulohan ni Eusivio Cranzo alyas Kuimander Brix nga milungtad og duha ka oras hinungdan sa paghikling sa mga sibilyan paingon sa luwas nga dapit.
Human sa duha ka oras nga kombati, miatras ang grupo ni Kumander Brix, biniyaan ang tulo niya ka mga sakop nga napatay.
Narekober sa mga sundalo ang mga tag-as nga matang sa armas, eksplosibo, bala, magazines, ug mga personal nga kagamitan sa mga NPA.
Gidayeg ni 6th Infantry (Kampilan) Division Chief ug Joint Task Force Central Commander Major General Donald Gumiran ang mga sakop sa 603rd Brigade ug 37th IB sa malampusong operasyon apan sa samang higayon nagpaabot sa iyang pahisubo sa pamilya sa mga nangamatay. (Edgar E. Fuerzas)