PATONG-PATONG nga ihap sa kasong rape ug statutory rape ang giatubang sa uyoan kinsa aminadong nakagamit og druga ayha niya giingong gilugos ang tulo niya ka pag-umangkon.
Kaniadtong Huwebes, Hulyo 3, 2025, gipaatubang sa mga sakop sa media sa Davao City ang suspek nga nadakpan sa National Bureau of Investigation (NBI) Davao Region.
Una niini, nakadawat og impormasyon ang NBI agent sa nahimutangan sa suspetsado hinungdan nga daling niaksiyon ang NBI-Southern Mindanao Regional Office (Semro), diin nadakpan ang suspek pinaagi sa entrapment operation sa Ecoland, Davao City, Hulyo 2, 2025.
Ang suspek niangkon nga nakagamit siya og marijuana ayha gihimo ang krimen niadtong tuig 2018 diin ang mga biktima nagpangedaron pa og 9-anyos, 11-anyos, ug 13-anyos.
Dugang nasayran nga dili lamang kausa ka higayon nahitabo ang pagpanamastamas, apan sa makadaghang higayon.
Wala na suma pa kaantos ang usa sa mga biktima, hinungdan nga nisumbong na kini sa ilang ginikanan butang nga nisibat suma pa ang suspek, apan nadakpan gihapon kini sa awtoridad pinaagi sa gahum sa warrant of arrest nga nigawas niadtong tuig 2022.
Ang mga biktima anaa na sa kustodiya sa Municipal Social Welfare and Development Office (MSWDO) alang sa gihimong social intervention kanila.
Sa kasamtangan, ang suspek gibalhog na sa selda sa NBI-Davao samtang naghulat sa sunod mando sa korte labot sa kaso nga iyang giatubang. (Jeepy P. Compio)